ਸੁਫਨੇ ਦੇ ਵਿੱਚ ਸੁਫਨਾ ਸੀ ਆਇਆ
ਯਾਰ ਮੇਰੇ ਮੈਨੂੰ ਕੋਲ ਬਿਠਾਇਆ
ਮਿਲ ਲਏ ਫੇਰ ਅਸੀਂ ਗਲ ਲੱਗ ਕੇ
ਅੱਖ ਖੁੱਲ੍ਹੀ ਤਾਂ ਤੁਰ ਗਿਆ ਛੱਡ ਕੇ
ਰਹਿ ਗਈ ਕਹਾਣੀ ਦਿਲ ਲਾਣ ਦੀ...
ਇੱਕ ਭੁਲੇਖਾ ਜਿਹਾ ਉਹਦੇ ਆਉਣ ਦਾ
ਇੱਕ ਯਾਦ ਉਹਦੇ ਤੁਰ ਜਾਣ ਦੀ ।
ਮਗਨ ਬਦਾਮੀ ਖੁਸ਼ਬੋਈਆਂ ਵੰਡਦੀ
ਮੈਥੋਂ ਨਹੀਂ ਉਹ ਜੱਗ ਤੋਂ ਸੰਗਦੀ
ਗਲ੍ਹਾਂ ਉਹਦੀਆਂ ਵਿੱਚ ਟੋਏ ਫੱਬਦੇ
ਵਾਲਾਂ ਦੇ ਕੁੰਡਲ ਘਟਾਵਾਂ ਛੱਡਦੇ
ਵਾਹ ਕਿਆ ਅਦਾ ਮੁਸਕਾਣ ਦੀ.....
ਇੱਕ ਭੁਲੇਖਾ ਜਿਹਾ ਉਹਦੇ ਆਉਣ ਦਾ
ਇੱਕ ਯਾਦ ਉਹਦੇ ਤੁਰ ਜਾਣ ਦੀ ।
ਪਹਿਲੀ ਛੋਹ ਉਹਦੀ ਝਰਨਾਟਾਂ ਛਿਡ਼ੀਆਂ
ਅੱਖੀਆਂ ਨਾਲ ਜਦ ਅੱਖੀਆਂ ਭਿਡ਼ੀਆਂ
ਸੁੰਨੀਆਂ ਗਲੀਆਂ ਤੇ ਭਖਣ ਬਨੇਰੇ
ਸਹਿਬਾਂ ਜਿਵੇਂ ਕੀਤੀ ਅਰਜ਼ ਹੁਜੇਰੇ
ਕਰੇ ਉਡੀਕ ਮਿਰਜ਼ੇ ਦੇ ਆਣ ਦੀ.....
ਇੱਕ ਭੁਲੇਖਾ ਜਿਹਾ ਉਹਦੇ ਆਉਣ ਦਾ
ਇੱਕ ਯਾਦ ਉਹਦੇ ਤੁਰ ਜਾਣ ਦੀ ।
ਸਾਹੀਂ ਉਹਦੇ ਸ਼ਰਬਤ ਜਿਵੇਂ ਘੋਲਿਆ
ਕੰਨ ਕੋਲ ਆ ਹੌਲੀ ਜਿਹੀ ਬੋਲਿਆ
ਯਾਰ ਵਿੱਚ ਰੱਬ ਹੁੰਦਾ ਅੱਜ ਵੇਖਿਆ
ਭੁੱਲ ਨਾ ਤੂੰ ਜਾਵੀਂ ਸਾਨੂੰ ਰੱਬ ਵੇਖਿਆ
ਕਰ ਗਈ ਪੱਕੀ ਫਿਰ ਆਣ ਦੀ.....
ਇੱਕ ਭੁਲੇਖਾ ਜਿਹਾ ਉਹਦੇ ਆਉਣ ਦਾ
ਇੱਕ ਯਾਦ ਉਹਦੇ ਤੁਰ ਜਾਣ ਦੀ ।
Friday 17 July 2009
Subscribe to:
Post Comments (Atom)
No comments:
Post a Comment